Item, de li [484] biscoti comprò suo fratello Sebastiam, a chi Dio perdoni, sono lì et si guastano. Item, dil danno pagò per il soracomito nostro dalmatin Francesco Grisogono, qual fo ducati 1200. Et noto pur, a dì 7 fevrer esso vice consolo à nova che la dita nave Contarina presa in porto esser stà disfornida dal corsaro e brusada. Et è da saper la dita nave andava a Jeviza carga di legnami per tornar con sali, e le do parte era di dito sier Alvise Contarini, et una parte di sier Piero Baxadona quondam sier Antonio.
     
      Da poi disnar fo consejo di X con zonta, credo per Piero di Medici.
     
      [1499 02 28]A dì 28 fevrer. In collegio fo aldido sier Alvise Zustiniam q. sier Marco, dolendosi zercha la pena volea pagasse per una partida etc. sier Francesco Foscari sora i banchi, et fo fato etc.
     
      Veneno do savogini con Antonio di Mastelli sanser, con lettere dil ducha di Savoja, date adì 15 zener in Zenoa, et dice al principe nostro fratri carissimo: scrive haver inteso el falir del banco di Garzoni, uno di quatro, et che si facea gran meraveja, e cum sit che Piero Corna et Eustachio Scarona havesse danari dentro come nel più sicuro di tutti i altri, prega la Signoria li fazi pagar e far justicia, oferendosi far il simile. Item, lettere dil Bastardo di Savoja data ut supra in loro recomandatione. Et il principe li fè risponder in franzese per Zuan Piero Stela secretario, come la Signoria non ha da far in li banchi, tamen el banco non è falito e steseno di bona voglia che dapoi pasqua comenzerà a pagar.