Da Castel Delze, di 26 a 27, di sier Jacomo Venier. Come è gran neve e tempi cativi; il conte si duol et si dispera, si scusa etc. Ha per uno fante, vien da Bibiena: dice è pan per tuto marzo, vin per 10 in 15 zorni, zoè el signor Bortolo, il proveditor et il magnifico Juliano et alcuni contestabili. Manda li conti de li danari dispensati; lauda molto sier [493] Sigismondo di Cavali pagador, et tutti voleno danari, né crede si potrà fra 15 zorni socorer Bibiena.
     
      Di sier Sigismondo di Cavali pagador, do lettere di 26 et 27. Manda li conti: li resta solum ducati 900 de li ducati 6000 à dato a li spagnoli.
     
      Da Bibiena di 26, in zifra. Ha ricevuto lettere di la liga fata, farà la note fuogi. Et esser venute lettere del ducha d'Urbin a li soi, promete immunità, cressimenti etc.; et partendosi li farà impichare. Et sono restati contenti di restar ancora 8 zorni; et che non à formento se non per 8 zorni, et altro come poi dirò.
     
      Noto. In questa matina, per el predicator di Santa Maria Formosa, nominato fra Zuane Brito da Castiglione di l'hordine di San Stefano, fue con gran cerimonie vestite tre heremite et acompagnate fino a la abitation per mezo San Zan Lateran, et ivi serate: le qual fono tre publiche meretrici qualle si erano convertite.
     
      [1499 03 04]A dì 4 marzo. In collegio non fo il principe. Fo aldito la diferentia di piovegi con li avogadori. Parlò primo sier Zuam Antonio Minio avochato per i piovegi; rispose sier Polo Trivixan el cavalier avogador olim, poi sier Marco Morexini avochato, et li rispose sier Lorenzo di Priuli avogador; et 4 consejeri fo per li avogadori, zoè sier Vetor Caotorta, sier Francesco da Pexaro, sier Luca Zivran et sier Lunardo Mocenigo; et per li piovegi fono sier Polo Barbo et sier Nicolò Bondimier, uno di 40 vice consejer in luogo di sier Marco Antonio Morexini; et fo terminà fusse oficio de li avogadori di comum etc.