Et a Curzola sier Alvise Balbi à retenuto alcuni et toltoli biave di misier Hanibal Castelan di Manferdonia, veniva qui.
     
      Di Curzola, di domino Thoma Malumbra episcopo a la Signoria nostra, data a dì 12 fevrer. Avisa, quel conte sier Alvise Balbi aver preso alcun di Manferdonia dicendo è marani, senza prova nì sentencia, et tolto la roba; prega la Signoria provedi per honor; et fo scrito a ditto conte.
     
      Di Jacomazo da Veniexia, di 26 fevrer, da Ravena. Come havia abuto ordine dil proveditor Zustignam di andar dal conte in campo, capo di quela zente, et li dava una paga, le qual zente non l'ànno voluta, et lui va con 20 cavalli; prega si provedi di mandar il resto.
     
      In questa matina, fo balotà ducati 6000 per mandar in campo; e scrito a li proveditori non fazi altri fanti, et balotà ducati 1000 per armar sier Antonio da Canal sopracomito, et sier Marco Antonio Contarini era zà expedito. Et per l'armirajo dil porto fo ditto in l'Arzipielago esser rote 6 nave: una nostra, una candiota et 4 barze forestiere.
     
      In questa matina zonse in caxa dil principe carpioni, trute et anguile, fono mandate a tuor a Peschiera per la Signoria nostra, per la venuta dil ducha di Ferara; et atento non veniva, el pesse fresco fu fato vender, comprò Servadio pescador, e li carpioni fono salvati. Etiam le colone di la caxa dil marchexe era conzade con tapedi, atento non si sapeva quando venisse, fono conze et poi disconze; adeo di tal mutatione in la terra se parlava, tamen la caxon non era sua.
     
      [496] Da poi disnar non fo nulla; ma questa matina intrò li cai di X in collegio et steteno alquanto, etiam li savii consultono poi tra lhoro.