In questo pregadi fo messo parte, per el principe, consejeri, cai di 40, savii grandi, savii a terraferma, e savii ai ordeni, atento lo illustrissimo signor ducha [502] di Ferrara dia vegnir in questa terra, che per honorarlo li sia andato incontra el principe col Bucintoro, et sia fato paraschelmi etc. secondo usanza, et siali dato danari al zorno per spexe come parerà al collegio. Fo disputation, parloe sier Antonio Trum, el serenissimo principe, sier Lunardo Grimani et sier Polo Barbo el consejer, andò le parte niuna non sincero, 64 di no et 120 de sì e fu presa; et fo ordinà gran credenza di la balotation.
     
      Item, per li savii a li ordeni fu messo parte di conzar li doni dati a le galie di Aquemorte, atento non havia trovà patroni, zoè fusse mudà ducati 1000 di danari di proveditori sora i uffizii, in locho di questi sia dato ducati 500 solo di deti danari et cussì come era di dieci oficii duc. 500 sia cresuti, ita che de' diti danari habino ducati 1000, siché senza creser danari, ma solum mutarli fu poste ditte galie, et che possa tochar Brandizo con li modi etc. Ave nulla non sinceri, 8 di no, et resto di la parte. Et noto el principe era molto contrario a far si metesse ditte galie, dicendo si deva doni senza utele, et io pur le volsi meter; et altro non fu fatto etc. Et era hore 22, fo licentiato el pregadi.
     
      [1499 03 08]A dì 8 marzo. In collegio fono alditi li nobeli a la Guarda con li 40 criminal: perché li 40 volevano far li nobeli di Aquemorte et quelli a la Guarda dicevano tocharli a lhoro; et fu fato termination per la Signoria: quelli a la Guarda fusseno, etc.