Item, fono poi col cardinal Vincula; qual li disse che l'orator di Monferà havia instato a questo, e crede non sia voluntà dil re di tal parole, ma li consejeri voleno servir dito orator; et etiam lhoro fono dal re et nulla li disse di tal materie. Et poi in zifra era alcune righe, che il re li ha dito voler mandar 700 lanze in Aste, et arà a l'impresa de Milan 1500 lanze francese, che sarà il dopio di quello è ubligato a meter per li capitoli.
     
      È da saper in la lettera di sier Hironimo Zorzi el consejer, particular a soi fratelli: par il re mandi zente in Aste, et à spazato il conte di Mixocho fiol di misier Zuan Jacopo in Aste. Et poi quel suo Dionisio scrisse a sier Francesco Zorzi di do oratori che manda, zoè el capitano Rubinet, capitano di 100 lanze e domino Claudio, et non dice a chi; unde fu divulgato per la terra venivano in questa terra, et fo mandato la matina seguente per sier Fedrigo Zorzi in collegio, et visto meglio la lettera se intese andavano questi do oratori a l'archiducha di Bergogna e non qui, et dice si principierà le guerre.
     
      Questa matina steteno sempre li cai dil consejo di X dentro in collegio, e li altri di fuora, adeo nulla fu fato. Et da poi disnar fo collegio, si reduse el principe con la Signoria et li savii: vene don Alfonxo fiol dil ducha di Ferara, incognito per casa dil principe, a visitar la Signoria in collegio, era venuto qui col padre segreto; et io non vi fui, andai a sant'Antonio [534] col proveditor sora l'armar sier Jacomo Contarini a pagar refusure di la galia sotil.