Da poi disnar fo pregadi, leto lettere con gran credenze e dato sacramento per i cai di X a bancho, a bancho: è avisi dil ducha per quello era venuto qui. Poi el principe referite le parole dil ducha ditte in collegio, et le parole di oratori fiorentini et di quel di Milan, et prima di misier Zuam Lucha, con le risposte li fece. Poi referite Zacaria di Freschi secretario in renga le parole diteli per il ducha; et che domino Aldromandino suo orator in bucintoro li disse haver saputo il contrasto fu di darli il [537] bucintoro al signor suo e chi parlò contra: et che ozi el ducha havia auto piacer di la risposta li era stà fata a li oratori. Item, fo messo parte, per li consejeri, cai di 40, savii dil consejo et di terra ferma, de dir doman al ducha che quando fiorentini li darà il compromesso, nui li daremo el nostro, et lo faremo auditor e debi expedir; et cussì senza altro contrasto ave 36 di no, e tutto el resto dil consejo di la parte.
     
      Item, fo messo parte, per li consejeri, che, atento che l'oficio di ordini veniva a compir questo mexe, che ozi in questo consejo sia fata eletion di 5 savii ai ordeni, con li modi e condition consueti, et have balote 5 di no. Et fata election io fui tolto per la banca, per sier Vido Caotorta el consejer fono tolti per numero 31, et rimaseno questi per hordene di balote: sier Vetor Capelo el savio ai ordeni q. sier Andrea qual vene in ultima 142:50; sier Marin Sanudo savio ai ordeni q. sier Ludovico 139:58; sier Faustin Barbo savio ai ordini q. Marco 136:57; sier Zuam Trevixan fo savio ai ordeni de sier Nicolò 115:75; et sier Zuam Moro q. sier Baldisera q. sier Zuam procurator, qual rimase di 5 balote da sier Marco Foscari q. sier Zuane q. sier Marco procurator, et cussì sier Zuam Moro intrò la matina seguente in luogo di sier Bortolo di Prioli qual era intrato dil consejo 40 zivil nuovo.