Item, si dice fiorentini esser in mali termini, et si converano dar ai potentati de Italia, non ritornando Medici in caxa. Et che, misier Zuane Bentivoy judicha la Signoria sia quella habi a dar leze ai soi inimici. Item, passò per lì lo episcopo Gurgensis, venuto di Spagna celeremente, va al papa a far reverentia e impetrar cosse contra la consientia soa: vol una dispensa di poter dar la fiola dil re suo al zenero re di Portogalo, che veria ad esser cugnata e moglie, per haver solum il principe ch'è puto; et etiam l'altra fia vol maridar nel fiol dil re d'Ingaltera. Item, scrive dil messo di Milan, è a Lucha per desviar stratioti.
     
      Vene el marchese Lunardo Malaspina Zuam Batista fiol dil marchexe Gabriel et sier Ipolito nuntio dil ditto Gabriel. Et prima fo leto una lettera di Galeoto Malaspina fiol di ditto Gabriel, data a Fosdenovo a dì 8 drizata a suo barba marchexe Lunardo, è qui: avisa la praticha di la pace si trata. Et poi esso marchexe Gabriel scrive e dice la Signoria di Fiorenza manda do oratori a la Signoria con pocho fondamento; in Fiorenza chi voria Milan e chi no; et il ducha di Milan li à mandato a dir per misier Galeazo Visconte non dubitaseno, vol mandar per Lunesana 60 homini d'arme, et vol lui mantenir l'impresa di Pisa, et fiorentini mantegni quella di Casentino: per tanto voria ajuto da la Signoria nostra. Or suo fiol dette una scriptura contra il padre dicendo era cosse finte; adeo el principe li disseno dovesse aspetar et non sarìano lassati in l'acordo.
     
      In questa matina fu fato comandamento, per la Signoria et il collegio, a sier Antonio da Canal andasse omnino via questa sera.