Et da Napoli di Romania di retori, et di Nepanto di sier Hironimo Trum, vice proveditor, et di sier Piero Sanudo sinico pur di Nepanto. Si have lettere zercha questa gran armata, et si fazi provisione.
     
      Et in le lettere di Corfù prime. Par che l'orator nostro, va al Turcho, zonto lì, volesse menar con lui a Costantinopoli alcuni turchi qualli fono presi per sier Polo Nani soracomito e lassati de lì in prexon; et che sier Beneto Valier di sier Antonio et sier Jacomo Contarini de sier Zuane, vieneno da Costantinopoli, lo ha consigliato non li menino con lui per caxon di non haver garbujo.
     
      Di sier Simon Guoro proveditor di l'armada apresso Corfù in galia, a dì 6 et 7 marzo. In consonantia di quello è stà scrito di sopra zercha l'armata dil Turco; et è stato a Castel novo a veder, aricorda al baylo debbi far conzar la cisterna. Item, lui proveditor se ritrova lì con do galie.
     
      Di sier Andrea Zanchani, va orator al Turcho, di 11, da Modon. Come a dì 8 si partì da Corfù et a dì 9 zonse lì a Modon, et ivi si ritrova sier Nicolò da Pexaro proveditor di l'armada, et Marco Barbo soracomito et le galie Zaratine venute con lui per dubito di uno corsaro turcho è in l'arzipielago, le qual galie sono mal in hordine, ha tempi contrarii, e sopra la galia, soracomito sier Zuam Francesco Baxadona, pur si parte e anderà al suo viazo. Et come uno Alvixe di Zuane, vien da Costantinopoli a la Signoria nostra, dice di la gran armata fa il Turcho et lui non crede; manda lettere venute da Costantinopoli con la nave patrom Urban di Orsi per el presente gripo.