Et cussì fo dito messa, e dato l'olivo e do palme bele una al doxe l'altra al ducha, et andono fuora a la procession.
     
      Da poi disnar fo predichato, vene il ducha etc. Et predichoe uno predichava a San Zane Polo di natione fiorentino di quel hordine chiamato ...
     
      Et essendo el principe a la predicha vene molte lettere di Roma, di 19, et altrove, tamen poi el collegio non si redusse. Et è da saper etiam ozi è il Perdom a San Zuam Crisostomo, siché è stato do volte questo anno in questa quaresema nescio quo modo, et il sabato santo e quello di servi, qual ozi vene il brieve, et fo a requisitiom di sier Hironimo Donado dotor orator nostro, lo qual lo have dal papa.
     
     
      [1499 03 25]Cerimonie fate in la publication di la liga.
     
      A dì 25 Marzo. Luni santo fo il zorno di la nonciation di nostra Dona. Prima fo conzato sopra la faza di la chiesa di San Marco con stendardi de doxi e capetani zenerali, pani d'oro e olivi, et li pani atorno la piaza come si fa el dì dil corpo di Cristo, et la faza dil palazo fu conzà con banchali e tapedi, tutta con belissimo hordene e artificio; e tutto di robe di mastro Stephano strazaruol, sta lì in piaza: a veder è tutte cosse fine e mai più non fu conzato a questo modo, adeo era belissimo spectaculo a veder. Etiam fo conzo a l'incontro da la banda di le hostarie e atorno la piaza con lavrani, erbe et olivi mandati a tuor fino in Cao d'Istria; et era questi stendardi dil serenissimo misier Thoma Mocenigo doxe, misier Piero Mocenigo doxe, misier Zuam Mocenigo doxe, sier Piero Loredam fo zeneral, sier Jacomo Loredam fo zeneral, sier Pantaleon Loredam fo zeneral, sier Frindam Griti fo zeneral, sier Vetor Soranzo fo zeneral, sier Antonio Grimani fo zeneral, sier Vetor Capelo fo zeneral, sier Jacomo Marcelo fo zeneral, et quello dil principe presente.