Item, el soracomito di Caodistria si parte, va con li danari in Istria ad armarsi. Etiam quel domino Urban Carazolo soracomito di Brandizo tolse licentia, va con uno di l'armamento ivi. Et il principe disse di alcuni li era venuti a parlar dicendo haver portà qui el corpo di Santa Marina verzene e martire, vien a dì 17 lujo la sua festa, et la sua legenda è stà trovà in greco a San Biaxio, et haveano portato una fede di l'arzivescovo di Corphù la qual sarà qui soto posta.
     
      Di Otranto, di sier Piero Nani governador, di ... marzo. Dimanda certa munition, et ha mandato uno a la Valona a veder l'armata, qual tornato li referite si conzava galie e fuste et era ordinato di tajar legnami etc.
     
      Di Antivari, di sier Piero Tiepolo podestà, di 19 marzo. Primo, quella terra esser mal in hordine e non haver niuna artilaria in arme da defendersi; et la causa dil sanzacho, per certo Garzon di Marchovichii li havia mandato presenti e satisfato, e mandò il suo cyroicho per medicar uno homo d'arme ferito, el qual tornato referite in Rossia el ditto esser stà ferito et esser stà morti da 20 milia turchi. Et li antiani e zudexi de Antivari scrisseno una lettera a la Signoria, dolendosi di sier Bernardo da Canal, fo lì podestà, che non volse lassar lì el sorabundante juxta l'hordine nostro, et li syndici essendo a Durazo li mandò a far comandamento et lui saludò de schiopeti, qual era zà montato in gripo. Item, à tochà ducati 4000 et non à speso ducati 1500, et li resta in le man ducati 2000: unde quasi non seguite gran rumor in collegio inteso tal cossa, et alcuni volea cometer questo caso a l'avogaria, et havea fautori sier Lucha Zivran consejer, sier Polo Pixani el cavalier savio a terra ferma et sier Zuam Trivixan savio ai ordeni.