Vene li do oratori di Milan, e misier Lodovico Bota parloe, era vestito di veludo negro, dicendo voleva tuor licentia, et si havea a dir alcuna cossa al signor suo. Li fo risposto andasse quando li piaceva e non si volea dir altro, et cussì tolse licentia.
     
      Vene Piero di Bibiena secretario dei Medici, et parloe altamente dicendo Paulo Vittelli è do mesi volea poner il magnifico Piero in Fiorenza, e volea venir a soldo di la Signoria. Or perché era materia di cai, tutti fo mandà fuora, tamen lui diceva forte [592] è noto a tutti, in conclusion si dolse assai. Quello li fu risposto, non lo so.
     
      Vene il marchexe Lunardo Malaspina con prè Ypolito, nontio dil marchexe Gabriel di Fosdenovo, dolendosi di questo acordo, dicendo el marchexe Gabriel suo fratello restava senza esser nominato, non sa che far. Or per niun li fo risposto, ergo, etc.
     
      Vene Zuam Alberto di la Pigna e fè chiamar Zacharia di Freschi fuora, et disse eri sera el signor conzò alcune cosse di la sententia; et fo parlato assai tra li savi, tutti disse la sua opinione et fo terminato far ozi pregadi per referir al pregadi.
     
      Da Cherso e Ossero di sier Alvise Badoer conte. Come era stà eleto Zorzi di Colombi soracomito, e subito lo expediria.
     
      Da Corfù di 6, 7, 8 marzo, replicade, e di 13. Manda lettere da Costantinopoli di sier Andrea Griti replicade, le qual non fo lete.
     
      Da Roverè di sier Nicolò da cha da Pexaro podestà, di 5. Come era passà di lì via domino Piero di Trieste, va orator per il re di romani a Milan, insieme con uno cavalaro dil ducha et 8 cavali: dice il re contra il ducha di Geler haver preso tutte le terre, restò solo una, à lassato il ducha di Sassonia lì a campo, e soa majestà è partito di Colonia, vien per la via di Costanza a Burner con 2000 cavali, ch'è in qua, contra sguizari.