Et quando disse questo, el Signor si voltò verso il bassà con ciera aliegra. Poi disse el Signor: ancor nui questo volemo sempre la Signoria el fazi; et che el fusse el ben venuto, e si havea a dir altro li bassà lo aldiria. E cussì si levò e partì dal Signor con li bassà in compagnia, qualli l'acompagnò fino a la porta, né pol haver audientia fino sabado che sarà a dì 9, che si farà l'altra porta: conclude esser stà visto gratamente de lì. Item, haver parlato a domino Pantaleo Coreze zenoese zercha li duc. 500 di dar per la pension dil Zante: dice esser contentissimo li darà e farali lettere di credenza.
     
      Nec alias. Noto, non dice nulla di haver dà li presenti al Signor, ch'è gran fato.
     
      È da saper a più chiara intelligentia di le cosse turchesche qui noterò alcune cosse intisi ozi da Alvise Sagudino secretario praticho molto a Constantinopoli. Prima el Signor turcho Bayseto à anni 55, à 7 fioli, el mazor ha anni 34, el minor anni 17. Item, à diexe done nel suo serajo et 80 di fuora, à 10 zeneri, è homo savio, studia e non li piace far mal; à tre bassà, el primo Embrai bassà homo di 75 anni juxta di nation turco fo ministro dil Signor, el segondo Charzego fo fiol di Arzith ducha fo fratello dil ducha Vlaticho lo cristiano et è zentilhomo nostro, il terzo Achmet bassà over Jacub ch'è zenero del Signor qual à gran poter e fo quello rompè li hungari. Item, sono do bilarbei come capitani zeneral, uno di la Grecia, qual è al presente Mustafà bei el qual sta fermo a Costantinopoli e senta con li bassà, et l'altro è il bilarbei di la Natalia.