[1499 04 10]A dì 10 april, mercore. In collegio vene Zuan Alberto, e portò la adition fata per il ducha a la sententia; e disse saria bon esso ducha stesse aspetar qui la ratification de' fiorentini la qual ozi verà; et fo consultato in collegio e terminato mandarli a dir non venisse questa matina esso ducha a tuor licentia, et sier Marchio Trivixam volea pregadi, pur a la fin si tolse zoso et fo mandato dirli non venisse et ordinà far pregadi.
     
      Vene li oratori di Pisa racomandandosi, dicendo erano in più servitù che mai; et per il principe gajardamente li fu risposto di la gran spexa si havia fato etc. E cussì tuti si levò.
     
      Da Corfù, di sier Cosimo Guoro proveditor di l'armada, date in galia, di 23 marzo. Voria far uno mercado de formenti con sier Hironimo Contarini q. sier Luca, di stera 5000 a lire 3 pizoli 16 el ster, per poter far biscoti. Et il rezimento avisa Caracasam corsaro turco, esser fuora con 7 fuste e à fatto certi danni. Item, manda qui maestro Cristoforo bombardier per solicitar le monition. Et il collegio si levò a bona hora per andar a uno sposalicio di sier Hironimo da cha da Pexaro di sier Beneto, in la fia di sier Bernardo Donado.
     
      Da poi disnar fo pregadi, vene il principe, e tutti li andò a tochar la man dolendosi di la morte dil nepote. Et per Zacharia di Freschi in renga fu referito il successo con Zuam Alberto: etiam eri fè questo instesso, che avanti fusse messo la parte referite; et ozi per lui, hessendo in renga, fo letto il sumario di la adiction fata per il ducha a la sententia, el qual è questo qui soto scripto.