Item, di la restitutiom di la nave Veniera era lì e la nave Permarina era a le Foje, risposeno non voler per hora restituirle per il bisogno, imo voriano la Signoria nostra ajutasse il Signor di nave nonché restituirle, ma expediti le dariano. Item, dil fiol di sier Anzolo da Canal per li ducati 410 tolti dal ... di Negroponte, disse scriveria il Signor lo satisfacesse; e poi li bassà lo menoe in camera dal Signor, e salutato, etiam el Signor lo salutò, e li bassà stete in piedi: e il Signor li disse dovesse salutar la Signoria per nome suo, e haver inteso la risposta li era stà fata per li bassà e quella bastava, e che era per mantenir la pace con la Signoria dummodo la Signoria facesse il simile, videlicet dicendo semo per confermarla. Poi esso orator li ricomandò li merchadanti nostri, tolse licentia e ritornò a caxa, [612] e aspectava la lettera di la referma di la pace e le quietation di danari, e si partiria fin 4 zorni per haver inteso era per darli licentia se più stava. Et scrive in zifra non havia voluto promuover la cossa di Zupa, nì etiam di la Zefalonia, perché quando li dete li ducati 500 per il Zante à inteso che li bassà disse la Signoria ha fato fabricar el castello che è contra i pati e perhò voleano dimandar indrio ditta ixola.
     
      Dil ditto in zifra, di 12. Come per uno calafao candioto bandito per homicidio di Candia havia inteso il numero vero di l'armata dil Signor de lì, el qual lavora in quella: dice come in aqua sono galie sotil 20, reviste fina le coverte, e per questo anno si pol navigar; in terra numero 24, et che do è conze e tre si va conzando, el resto mal conditionate; sono in aqua fuste 6 grosse di banchi 18 in 20 e palandarie grosse numero una, di le qual si conza in aqua fuste 16 et 5 sono conze.