Item, fo messo per li consejeri, savii dil consejo, excepto sier Ferigo Corner el cavalier e sier Antonio Grimani el cavalier, li savii a terra ferma e li savii ai ordeni: che in nome di misier Jesu Cristo el primo gran consejo sia electo capitano zeneral da mar, potendo esser electo di ogni officio e continuo et rezimento, con l'autorità etc. Item, di elezer 10 sopracomiti, il primo pregadi per 4 man di eletion e la bancha: et sier Marco Malipiero cao di XL intrò in la parte con questo li soracomiti sia electi per 4 man di election e la bancha in gran consejo; et sier Ferigo Corner et sier Antonio Grimani procuratori savii dil consejo vol il capitano sia electo di ogni oficio ma non continuo; et sier Antonio Grimani andò in renga scusandosi non voler andar capitano al presente, e si oferse andar al bisogno e armar 10 galie di soi danari, per tanto exortoe non fusse preso di far di ogni officio continuo: et mandata la parte have nulla non sincere, nulla di no, quella di do savii 15, dil cao di XL 32, e dil resto 160, e fu presa.
     
      Item, fo posto per li savii dil collegio e terra ferma di scriver a li oratori in Franza il successo di la sententia, e mandarli la copia, e dovesse mostrar e dir al re non si aspetava questo dal ducha di Ferrara per esser contra quello ne havia promesso e oferto di far; et che si aricordassemo nominar soa majestà et che eramo per mantenir la fede e la liga, et la reverentia e observantia verso la regia majestà. Et sier Francesco Trum savio a terra ferma volea fusse mandata la scriptura dete il ducha di Ferara zercha l'acordo voler far con Milan, et li dovesse dir il partir di li oratori di Milan di qui et dil ducha, il qual andò in renga ma non fu aldito, et fo ditto si scriverà un'altra lettera di li avisi da Costantinopoli e di la election dil capitano zeneral e bon numero di soracomiti.