In questa matina sier Antonio Grimani procurator savio dil consejo et electo capitano zeneral di mar, hessendo reduto tutto il collegio, si levò e disse alcune parole, et aceptoe la capitaniaria di bon animo, e pregò la Signoria lo compiacesse di tre cosse: primo si l'armada dil Turco non ussisse over ritornasse in Streto dovesse vegnir senza altra licentia a disarmar, demum non fusse mandato via si l'armada nostra non era in hordine, terzio cussì come havia dito de armar 10 galie dil suo, così al presente prestava a la Signoria ducati 16 milia, zoè duc. 8000 de presenti et 8000 questo lujo, con questo li fusse fato le obligation segure per il consejo di X di haver li soi danari fin 6 mexi; et cussì il principe li tochò la man, e tutto il collegio si comosse e li tochò la mano pregando Dio acetasse in bona hora, et fo [622] laudato dal principe, et dito si faria quello el dimandava.
     
      Da poi disnar fo collegio. E prima questa matina el collegio si levò a bona hora per andar a S. Thomà a uno sponsalicio di sier Francesco Longo in la fia q. Antonio Marcello q. sier Jacopo, et da poi andar a San Severo a far el per di noze di la fia di sier Hironimo Zorzi el cavalier e orator in Franza in Stefano Trivixam q. sier Domenego.
     
      Et in collegio fo consejato la comissiom di Alvise Sagudino per mandarlo a Ferisbei sanzacho di Scutari, con presente di vesti per ducati 300.
     
      Di Pisa di proveditori, di 6. Come inteso i nimici venivano grossi per meter vituarie in Librafata e nel bastion, et Vicenzo Valier proveditor cavalchoe la note a la volta lhoro con li stratioti e cavalli lizieri, e passono in monte San Juliano e andono verso Lucha, e li homini d'arme e fanti restarono di qua dal monte, tandem niuno vene, et nel ritorno nostri se messeno a corer, con certi stratioti.