Et come par per lettere di ditto sier Vicenzo Valier, particular, el caval li caschò soto e restò in angosa sopra i sassi et fu portato a caxa. Item, stanno con expetation di la pace, tuta via fiorentini lì intorno se ingrossavano; tamen el Valier varite subito.
     
     
      [1499 04 16]A dì 16 april. In collegio vene da poi fato la processiom per la piaza di San Marco per esser el zorno di San Sydro, et vi fu el principe oratori etc. Or reduto poi il collegio.
     
      Da Milan di l'orator, di 12. Come andando eri col ducha contra l'orator di Napoli, vien di Franza, il ducha li disse che l'orator dil re di romani li havia exposto che havendo il re di Franza fato liga con la Signoria nostra, volendo venir contra di lui esso re li offeriva ajuto suo e de l'imperio, e bisognando veria in persona ad ajutarlo, e per tanto voleva haver comunichato questo con esso orator, etiam scriveria a l'orator suo qui, lo dicesse a la Signoria, et che lui non lo dicea ad altro fin se non per dir il vero, e creda tutti quello voleno.
     
      Da Venosa di sier Francesco Morexini dotor orator nostro apresso il re di Napoli, di 6. Narra esser stato in Andre la setimana santa e per quelli lochi col re, et soa majestà a dì 14 vol esser a Napoli.
     
      Da Grota Menarda dil ditto orator, di 8. Come che il re havia auto lettere di Napoli eri che la raina havia parturito un bel puto.
     
      Da Ravena dil podestà, di 11. Di certo remor acaduto a Cesena, come par per una lettera mandata a lui per il governador di Cesena et romagna, la qual mandava a la Signoria nostra etc.