Da Castel Delze di proveditori, di 17. Come haveano ricevuto nostre lettere di 13. Di la licentia, e prima partino li bisogna ducati 2000, et che a Rimano era assa' farine, forsi stera 5000. Item, hanno mandato a far trazer l'artilarie di Bibiena, et fiorentini li scrisseno si ben nostri si partirano l'artilarie sarano salve. Item, aveano mandato 25 mulli di vituarie a Bibiena; et che 'l conte di Sojano dice dubita di convicini, et di quella madona da Forlì, si ben è seguito ditto acordo etc.
     
      Da Roverè di sier Nicolò da cha da Pexaro podestà, di 16. Come quelle guerre si scalda più che mai, agnelini è in gran numero e ben in hordine vano in campo, et ne passano per Brexa e de lì; et sguizari è grossi, hanno preso alcuni castelli et hanno il favor dil re di Franza; et etiam el campo regio per zornata se ingrossano.
     
      Da Brexa, di sier Polo Trivixam el cavalier podestà, sier Zuam Francesco Pasqualigo doctor et cavalier capitano, di 18. Come una cortina di muro dil castello cazeva se non se li reparava: haveano mandato misier Rigo inzegner a veder, dice con ducati 300 si conzerà; et li fo scrito dovesse far conzar. Etiam fo concesso a domino Thadeo da la Motella, mediante il favor di sier Marco Sanudo, era in collegio savio a terraferma, che ducati 400 era debito a la Signoria nostra in camera, et molestà per sier Hironimo Capello proveditor a pagar, dovesse pagar in anni 4, zoè ducati 100 a l'anno: et cussì fono facte le lettere per esser fidelissimo nostro.
     
      Da Padoa, di rectori. Come aspectavano risposta si doveano lassar andar agnelini via in lhoro campo, per haver abuto comandamento da li soi capitani sub poena etc.