In questo pregadi fo messo parte, per sier Marco Antonio Morexini el cavalier, consejer et sier Constantim di Priuli savio dil consejo a terra ferma, atento sia preso di far do oratori, qualli era stà aceptà la scusa, et essere andata quella eletion con desordene, che sia ozi electo uno solo orator in Franza. Et sier Ferigo Corner, sier Marco Trivixan, sier Antonio Grimani procurator, savii dil consejo, sier Francesco Trum, sier Alvise Venier, sier Marco Sanudo et sier Zorzi Corner el cavalier savii a terra ferma, vol si stagi su quel è preso di far do oratori. Parloe sier Francesco Capelo el cavalier, era proveditor sora la sanità, et stato orator in Franza, [642] dicendo era mal far uno ora solo; li rispose sier Marco Antonio Morexini el cavalier, et poi sier Ferigo Corner su la rengeta: et disse che misier Francesco Foscari doxe disse voleva veder quando stemo ben quando è purassà ambasadori in questa terra et disse chi ingiote i gambelli puol spuar pulesi, siché non è gran spesa; poi disse son vechio, et senza fioli: laudamus veteres et nostris utimur annis; et andò la parte, una di no, quella dil consejer et savio 56, et dil resto di savii 134.
     
      Item, fo posto per sier Polo Barbo et sier Luca Zivran consejeri una parte zercha la exation di debitori, et che 'l sia electi do proveditori qualli debano sottoscriver a li boletini di governadori cazude et razon nuove, et li exatori habino una et meza per cento di più, et in termine di zorni 8 tutti pagino senza pena; contradixe sier Francesco Foscarini da San Polo, rispose sier Polo Barbo, poi parlò sier Tomà Donado exator a le raxon nuove: et andata ditta parte 78 fo di la parte, 107 di no, et fu preso di no.