Da Ravena, dil conte di Pitiano, di sier Alvixe. Venier podestà et capitano, et di sier Jacomo Venier proveditor, di 27. Esser zonto lì con grande honor, haver fato comandamento a le zente vadino ai lhoro alozamenti, et 150 stratioti vadino a Padoa fino la Signoria li hordinerà altro. Et come per sorte a lui provedidor havia tochà venir con il conte, havia mandà a Ferrara dal vicedomino a tuor il passo dal ducha di passar, et anderà sul Polesene di San Zorzi; et il Zustignan collega restava a Castel Delze, aspectava lettere nostre; al qual fo scritto per collegio venisse via, lassando qualche uno lì sora le munition. Item, come di Codignola era stà scrito a Vicenzo di Naldo che la Madona di Forlì li voleva parlar, et esso podestà non havia voluto darli licentia vadi senza nostro ordine.
     
      Da Ragusi, di Nicolò Gondola, di 27 marzo. Come à avisi di 7 da Constantinopoli di la gran armata fa il Signor turcho, et dil capitano electo ch'è quel di la Vallona Amech; et esser stato ivi oratori dil re di Hungaria et Polana, etiam quel di Rodi.
     
      Noto. Erano in questa terra oratori di Padoa, Vicenza et Friul, quali tutavia voleano audientia, et Brexa ne mandava doi domino Malio Avogaro et domino Zuam Batista di Piam.
     
      In questo zorno fo scrito per la Signoria nostra una lettera al re di Hungaria, autore sier Marco Sanudo di terra ferma, per uno astrologo qual era qui che volesse lassar portar li soi instrumenti.
     
     
      [1499 04 30]A dì ultimo april. In collegio vene il signor Carlo Orsini, vestito di negro et di oro, è homo picolo, grasso, fo fiol dil signor Virginio natural, et è signor di l'Anguilara, sentò apresso il principe et portò una lettera di provedidori di campo di 20, in sua [659] recomandatione; disse alcune parole offerendosi.