Item, che li savii di collegio, che non meteno ballota, in le ballotatiom escano fuora di pregadi, e cussì tutti altri che non mete ballota, soto grave pene.
     
      Item, fo messo, per li savii dil consejo, terra ferma et ordeni, la comisiom dil capitano zeneral di mar: videlicet andasse per Dalmatia con le do galie a interzarse, et li è dati 4 libri da Zara, Sibinico et Spalato, et debi per ultimo pagar la refusure, ma prima fazi ogni experientia di haver homeni de lì. Item, debi solicitar el resto di le galie si arma per Dalmatia. Item, vadi a Corfù a far la massa di l'armata, over a Modom poi a Caomalio e in l'Arzipielago vadi con l'armada; e scontrando l'armada dil Turcho, fazi bona compagnia per mantenir la paxe e li dagi rinfrescamenti. Item, conservi tutti i lochi nostri e li defendi. Item, si ditta armata turchescha andasse a Rodi, non si impazi, et si la tenisse la volta di Cypro, debbi lì andar avanti o da drio e varentar quella ixola nostra; e retegni nave, navilii, etc.; havendo ogni libertà. Item, si l'andasse in Puja esso capitano debbi quelli lochi, tenimo in pegno, tratar come nostri. Item, non dar il porto di Brandizo, e dirli si 'l fusse richiesto non è bastante a star do armate la nostra e sua. Item, con li tre provedadori di l'armata zoè ser Nicolò da cha da Pesaro e sier Domenego Malipiero e sier Simon Guoro debbi consultar, e la più parte vaja di le opinion, ma lui capitano con uno provedador s'intendi la più parte; in el navegar lui solo capitano comandi. Item, habi libertà civil et criminal sopra tutti.