In collegio li savii si redusse, et nui savii ai ordeni vegnissemo zoso di gran consejo per consultar, et fo expedito Jacomo di Tarsia, va in Cypro con 50 provisionati et è capitano ivi di le fantarie, Zanon da Colorgno con 150 fanti, et uno altro contestabele qual parerà, qual fono expediti statim con altri 150 fanti, et cussì la matina in collegio fono balotati.
     
      Item, fo scrito per collegio a Rimano al secretario nostro debi andar a Urbim a dolersi col ducha, perhò che par che hessendo andato Hironimo fiol dil conte Federico dal Monte a ditto lhoco dil Monte, fè prender alcuni et uno di quelli rebelli fece apichar, et questo fo a dì 28, et tornando per la via di San Marino da questi di ditto ducha fu asaltato, et morto alcuni, et retenuto esso Hironimo, unde el signor di Rimano mandoe a dir al prefato ducha, per Pier Francesco da Gemona, non volesse inovar, hessendo una volta per intercession di la Signoria nostra acordate quelle diferentie; et par esso ducha facesse ruinar la rocha, siché vadi li con lettere di credenza a dirli dovesse star in paxe.
     
     
      [1499 05 02]A dì 2 mazo. In collegio. In questa matina da poi terza, sier Antonio Grimani procurator capitano zeneral di mar si partì con la sua galia di sora porto, andò suo secretario Alvixe Bevazam, el soramasser Piero di Paxe; van in Istria col nome di Cristo.
     
      Et eri fo per collegio scrito in Istria a sier Andrea Baxadona capitano di le galie di Barbaria, per mio aricordo con voler dil principe et consejeri, che dovesse restar lì fino a doman, per el consejo di pregadi li saria mandato novo hordine, et cussì fo spazà.