Item, la nave Pandora di bote 2000 è sora porto, etiam quella di Andrea di Viviam ch'è di Grimani, et la nave Zustignana; fato la zercha per uno savio ai ordeni et il provedador sora l'armar in nomine Domini fece vella; et etiam la galia sotil Tajapiera ozi si partì.
     
      Da poi disnar. Collegio nostro si reduse. Et gionse qui domino Taliam da Carpi condutier nostro, et etiam Hironimo Bariselo contestabili a excusarsi di esser rimasti lì, et etiam portoe una lettera di signori pisani.
     
      Ancora vene lettere di Corfù, vechie, Modom Napoli di Romania, dil provedador Pexaro, di 15 marzo apresso Syo, et dil provedador Guoro apresso Corfù; le qual lettere non fu lette per non aversi reduto.
     
     
      [1499 05 10]A dì 10 mazo. In collegio vene sier Jacomo Venier venuto provedador di campo, stato a compagnar il conte di Pitiano a Gedi, et volendo referir el principe li disse come da poi disnar in pregadi rifereria, et arìa solo una faticha.
     
      Vene sier Andrea Zanchani venuto orator dil Turcho: disse come il Turcho armava et havia visto a Galipoli di ogni sorte navilii, sarà galie 70, et altre galiote 30, nave etc. Capitano il sanzacho di Galipoli zenero dil Signor; et si diceva da Nicomedia verà altre 20 galie ma non crede vegnirano, la qual armata ussirà a la fin de mazo, sarà nave 19, galeaze 3, et una nave granda andò a fondi et l'altra nave granda era in hordine, et la segonda era messa a charena, arà 200 velle tra nave, galie et palandarie, et fuste 100, et le galie era a Constantinopoli sono mal conditionate.