Come quella terra stava mal per questi movimenti turcheschi, et bisogneria fortificar quel castello, et voria libertà da spender.
     
      Da Napoli di Romania, di sier Piero Sanudo synico, di 2 april. Avisa nove ha di l'armata turchescha, et voria la Signoria mandasse danari per dar paga a li fanti che moreno da fame.
     
      Di Candia, di sier Bernardo Zustignan capitano et vice ducha, di marzo. Manda alcuni avisi di l'armata turchescha. Et faceva metter in hordine le galie lì in Candia, solicitando a la expedition.
     
      Di sier Nicolò da cha da Pexaro provedador di l'armada apresso Syo, di 15 marzo. Come magonesi voriano retenir la nave Choresa, la qual dovea andar in Candia: si à dolto etc. Item, dimanda sartie che li bisogna per la sua galia.
     
      Da Puola, di sier Bortolo Calbo conte, di 6 et 7 et di Zorzi Dragam. Zercha la barza picola, et volendo conzarla, et essendo a charena l'alboro, seguite certa movesta etc. tandem anderano dredo conzandola meglio potrano.
     
      Da Feltre, di sier Matio Barbaro podestà et capitano, di 8. Come ha aviso agnelini et sguizari esser stà roti da l'imperador, et volevano renderli la cità di Agnelina, et questo ha dil conte di Monte Alto.
     
      Da Treviso, di sier Andrea Dandolo podestà et capitano, di 9. Zercha stratioti, et havia fato la mostra lì, et voria libertà da spender per questi; atento quella camera è obligà al consejo di X, siché non pol tochar li danari. Item, voria li cavali have Basilio da la Scuola.
     
      Da Rimano, di Zorzi Franco et Marin Biancho. Zercha le munition sono lì. Le qual non fo lete, et simel altre lettere.