Item, non si atrovava altri corsari lì in levante, salvo doy barzoni et alcuni pochi bregantini tutti armadi con zente de lì. Voria per opinion sua la Signoria nostra scrivesse al cardinal.
     
     
     
      Relation di sier Andrea Zanchani,
      venuto orator nostro dal signor Turcho.
     
      Riferite sier Andrea Zanchani, venuto orator dal Turcho: prima come stentò a trovar zurme per la Dalmantia, con la galia del provedador Guoro, et zonta la galia Baxadona a Cataro montò suso, et el provedador Pexaro lo vene a compagnar con do galie fino a la bocha di streto a li Dardanelli, li vene contra le merchadanti nostri, et zonto a Constantinopoli alozoe in Pera, et poi il Signor el luni li die audientia, cossa inusitata, licet quel giorno sia zorno di porta, tamen mai non dà audentia ma vol riposo. Or prima disnoe con li bassà e poi fo introduto a la soa presentia, et il Signor volse lui sentasse prima per mezo di lui e fense di sentar, ma si levò ita che tutti a un tempo sentono, li volse basar la man, lui non volse. Or dimandò come stava el doxe: rispose ben; et che havea spazà do zorni avanti la sua venuta li oratori di Hungaria, quali partino re infecta. Or esso orator expose la sua ambasata, che fo 7 cosse: primo la confermation di la paxe; secondo di le cosse di Franza et Mantoa; terzo dil dacier suo era qui in prexom per il qual li dette ducati 1500; quarto dil Zante e la Zefalonia; quinto di almadari e carazari; sesto di la incursiom in Dalmatia fata e di cosse di Antivari, la cossa di Cataro et Zupa; settimo di merchadanti nostri che li fazi bona compagnia.