L'ambasador de Rhodi è stà licentiato senza algun fructo de quanto dimandava, zoè li homeni soi che sono in preson. Chi volesse far desmeter la impresa da questa armata, non seria altro remedio che questo, che li ungari se movesseno, et non vojendo far de vero almeno qualche bona demostration, che essendo questo Signor de natura spauroso, leziermente lo farìano desmeter da la impresa.
     
     
      Copia e sumario di una lettera data in Pera
      a dì 16 marzo.
     
      Benché per la magnificentia di l'ambasador intenderete el tutto, non voglio restar di tochar qualcossa zerca i preparamenti fa questo Signor: el qual fa una grossisima armada, sarà nave do di bote 2500 in suso, e altre nave di numero 16, da bote 500 in 300, galeaze 3, galie sotil da 100 fuste, da 60 palandarie et altri navilii credo sarano velle 300; e poi el fa campo per terra; e lui va in persona. Dove ditta armada e campo va non si pol intender, fermo la brigata divulga el forzo per Rhodi, altri dize in Puja, tamen io mi credo anderà a Rhodi, non che creda che 'l Signor sia per passar su l'ixola ma starà per contra Rhodi, et haveralo, ben ch'el sia forte, ma non porà resister; e si la fortuna permete habi come stassemo, non si navegeria più in levante el resto di l'ixole di l'arzipielago, Cypri e Candia, si potrà meter per spazade: siché le do necessità far con questui una bona guera, che altro remedio non vedo a cui vol salvar questi lochi. L'armada zudego sarà tutto mazo che la non sarà in hordine, ma certo è per ussir, salvo si non si facesse sifata armada e quella redur verso Candia avanti questa usisse, potria esser restasse, maxime essendo questo Signor spauroxissmo e timido, e questi suoi bassà son gran bestie, par che Dio e el diavolo sia con lhoro, non per inzegno né cervello, ma la potentia ch'è grande; e se li boni cristiani volesse, credete che presto questo stado se meteria soto sopra, e con i fioli proprii de questo Signor se li faria guera, perché cadauno di lhoro [705] atenderia a partiti le necessità, questa volta venitiani dimostra la sua forza per dar a intender a costui che habiamo animo di responderli; mi rendo certo el torà Syo, ma non haverà faticha di combater, ché si darano; questo saria tempo ch'el re di Franza mandasse socorso potente di nave per esser cossa che tocha a lui per il gran maistro di Rhodi ch'è franzese; dubito sarà cossa longa, desidero sentir la pace in Italia sia fata, perché daria favor a le cosse nostre e far qualche lega universal contra costui.