E inteso l'arà vol mandar homeni a retenerli et mandarli a Otranto. Item, avvisa uno capitolo di nova di l'armata dil Turcho, si dice va per Rhodi et per Puja a tuor el corpo di Gem sultan, tamen non è vero.
     
      Da Caxopo, di sier Domenego Malipiero provedador di l'armada, date in galia a dì 5 mazo. Come era zonto lì, con le 4 galie in tutto venute da Pisa, solicita li albori, quali erano zà sta balotati in collegio, et curaze, et sovention a li homeni.
     
      Da Corfù, di sier Antonio Moro baylo, di 13 april. Zercha haver fato le mostre a le compagnie di Marco da Navara et Zorzi Todesco: voriano danari, et per il zeneral li fo mandà una paga.
     
      Di Franza, di sier Antonio Loredan el cavalier orator, venute a hora, date a Bles a dì 6 mazo, per Zuam Gobo corier portate. Replica lettere, et haver ricevuto nostre di 9, 10, 13 et 17. Et come el capitano Rubinet tornato di Bergogna havia reportà quel ducha voler esser in acordo con el re, non obstante il padre, re di romani, l'habi molto exortato a non far; et vol venir da soa majestà, si quella vol andar a una terra a li confini; el qual re non si partiva per la venuta dil ducha e duchessa di Borbon, et poi anderà verso Orliens; ha mandato comandamenti a le infrascritte zente d'arme vengi di qua da' monti, zoè 400 lanze a monsignor de Lignì, lanze 100 al [715] capitano de Rubinet, 100 a monsignor di la Palissa, 100 a monsignor di Foys, 100 a monsignor de Sandicort, le qual zente anderano a Liom. Ma scrive poi dil passar monti dite zente, non ne parlò parola soa majestà. Item, el ducha di Lorena li à dato certe nove de' sguizari, manda la copia, Item, quella matina fo dal re, qual era ritornato dal vilazo e lo vete volentieri.