La qual parte balotada have tutto el consejo. La qual nave era carga di sal, fo discargata et subito armada, et fu posto patron Stefano Ottobom, la qual è di botte ..., et fu di la Signoria nostra, la qual la vendete per ducati 1000 a li Pixani dal bancho, et questi Pexari da Londra li mudò l'alboro, et è perfeta nave.
     
      Item, fo posto, per nui savii ai ordini, di tuor la nave di sier Alvise e sier Hironimo Grimani e sier Anzolo Contarini, patron Andrea di Viviam con homini 110, per ducati 550 al mexe, con tutti i modi fono tolte le altre nave: per parte messa in questo consejo, have 5 di no, el resto di la parte.
     
      Item, fo posto per li savii dil consejo e terra ferma, di risponder a lettere dil re di romani, et a li altri in materia di Bassan: come quel loco era nostro zà più di 100 anni, et che soa majestà era intrigato, et nui eramo devotissimi di quella; et cussì mutatis mutandis a l'archiducha; et fu presa et fate le lettere, fo poi expedito quel corier che la aspectava.
     
      Item, fo posto per li savii di terra ferma di dar fin ducati 2000 a quelli erano stati a l'asedio in Bibiena, qualli erano ogni dì alle scalle; et el principe con li altri savii volseno aspectar fin doman; et si levò, et comandato credenza non fo balotà.
     
     
      [1499 05 15]Adì 15 mazo. In collegio. In questa matina la nave Gradeniga fè vella, et do galie sotil, quelle di Arbe et Pago.
     
      Vene l'orator dil re di romani dimandando expedition, li fo risposto per il principe non si havia potuto, fin do zorni si faria.
     
      Vene li merchadanti dil fontego di todeschi con [719] missier Zuam Batista ... dotor lhoro avochato, dolendosi de li vicedomini nostri: primo, non voriano barche stesse a la riva dil fontego; et che li era tolto pizoli 4 per uno, per la spexa di pozi, tamen non era aqua; tertio, si dolevano li era desligà le balle per veder li contrabandi con gran danno lhoro.