Item, fu messo, per li savii dil consejo et di terra ferma, la comission di sier Polo Capelo el cavalier, va orator a Roma, in forma, et più procuri di far uno de' nostri cardinal; ave una di no.
     
      Item, posto per li ditti di risponder a l'orator dil re di romani, che dimandava danari, licet la lettera di credenza fusse di april 1498: justificar la Signoria nostra, et di la spexa grande fessemo quando soa majestà vene in Italia, et se lui dimandasse li ducati 6000 promessi li sia ditto, per il principe, la cossa di Goricia, et quando quella fusse expedita se li daria; et mandata la parte, sier Marco Antonio Morexini el cavalier consejer contradisse, li rispose sier Marchio Trevixan savio dil consejo, era in setimana, tandem fu levata la zonta di dirli di le cosse di Goricia, et messeno donarli ducati 50, et sier Marco Antonio Morexini voleva 100, et farli le spexe poi si tolse zoso; et ditta parte fo balotada do volte: la prima di darli ducati 50, et non fu presa, have 57 di no, perché la vuol i tre quinti dil pregadi dove intravien dar la Signoria nostra, et cussì nulla fu preso di dar.
     
      Item, sier Nicolò Foscarini savio dil consejo; volse far lezer la sua parte di cassar il ducha de Urbin, et non fu lassato perhò che 'l principe era venuto di sora via in cheba; et fu chiamato el consejo di X, et mandato per sier Vido Caotorta consejer [723] acciò fosseno 4 consejeri, et potesseno far consejo di X, qual vene, poi intrò el collegio et fo licentiato il pregadi, da poi che steteno aspetar più di una hora, et comandato credenza la deliberation di la risposta di l'orator dil re di romani, et poi subito vene zoso el consejo di X.