Da Cataro, di sier Francesco Querini retor et provedador, di 5 mazo. Come a dì 29 dil passato sopra le saline era stà trovà morto Antonio almadaro dil Signor turcho, copato di una manara, qual ivi stava con uno puto, et lui conte havia fato inquisition, examinò il puto, disse in lengua turcha haver visto, etc. Unde à dato taja di ducati 500, chi dirà la verità di tal morte; et ha scritto al sanzacho; et quelli altri voivoda di Castel novo pur lhoro si duol, dicono nostri haverlo fato amazar. Et come, a dì 29, el sanzacho si partì con la compagnia, si dice è andato verso Sophia, over Andernopoli.
     
      Da Dulzigno, di sier Piero Nadal conte et capitano. Dil partir dil ditto Ferisbei sanzacho; ergo el Sagudino va indarno.
     
      In questo pregadi fu posto per li savii ai ordeni di reincantar la galia di Fiandra, patron sier Piero Trivixan, con don di ducati 500 di acrescimenti, et provision nuove, quali debi scontar, et possi ne l'incanto, et il patron si provi in termene di zorni 8, a danno di ditto sier Piero, atento li consejeri erano stati a l'incanto a Rialto et non havea trovà patron; et ditta parte have 8 di no, tutto el resto dil consejo di la parte e fu presa.
     
      Item, fo posto, per li savii dil consejo et di terra ferma, di scriver a l'orator in Franza, et avisarlo di le nove si ha de le cosse dil Turcho che va a Rhodi, et di l'armada femo, et di la venuta dil Zanchani, il partir dil capitano zeneral, et di la venuta di l'orator cesareo per danari, et la risposta di le lettere in materia di bassà per domino Gasparo Slinch.