Per una avisano di 9 fuste di turchi e uno bregantin venuti de lì via; et che sier Simon Guoro provedador andò fin a la Vallona a soraveder. Item, quelli di le fuste messe in terra su loco de' turchi, e menono via anime 9, et non sono più ditte fuste de lì via: aricorda le provision; e à mandà le lettere a sier Antonio Gritti.
     
      Da Dulzigno, di sier Piero Nadal conte e capitano, di 28 april. Alcuni avisi di l'armata turchescha. Et che il Signor andava in persona con exercito, et vien, come à inteso, in Albania, per tratato ha in Cataro, Budoa e Antivari, ergo etc.
     
      Vene Donati di Preti secretario dil signor Zuane di Gonzaga, qual voleva esso signor venir a la Signoria: li fo ditto venisse doman. Et mostrò una lettera abuta da don Hironimo, data a Mantoa a dì 15, come li ducheschi, che erano contro il conte Guido di Novalara di la caxa di Gonzaga, nulla haveano fato, et lui don Hironimo voria esso signor Zuane si conzasse con la Signoria nostra, et fa oration. Item, esser venuto el Brognolino da Milan, e si aspectava uno secretario dil ducha per la intention dil signor, qual à bon animo etc. Item, à nova di Milan, come el ducha à ditto ai oratori fiorentini: si fiorentini, li vol dar 300 homini d'arme et 2000 fanti pagati contra il re di Franza, li farà haver Pisa; et ditti oratori hanno scritto a Fiorenza e aspetano risposta; et prega si acordi con la Signoria, aliter vol andar in eremo più in là; et si racomanda con li altri heremiti.
     
      Da poi disnar fo consejo di X, ma non si redusseno, etc.