[1499 05 18]A dì 18 mazo. In collegio. Veneno li cai dil consejo di X con sier Hironimo Lippomano, et li soi parenti sier Piero Capelo q. sier Zuane procurator, sier Nicolò Trivixam, q. sier Tomà procurator, sier Daniel Vendramin cugnado, sier Domenego Foscari q. sier Alvixe zerman et sier Piero Contarini; et disse voler pagar tutti li soi creditori, et sieno electi do; et vol poner 10 milia ducati hanno de contadi in una cassa a li camerlengi, et scuoder li [731] debitori, e pagar tutti. A l'incontro erano molti creditori, tra li qual sier Bastian Valier, sier Andrea Foscarini q. sier Bernardo, sier Nicolò Donado q. sier Luca, sier Francesco Alberto, sier Piero Marzello q. sier Jacomo, sier Etor Contarini et sier Gasparo Malipiero e molti altri; et parloe el Malipiero, domandando sia canzelà il salvaconduto, over debi dar a li creditori cauzion per ducati 70 milia. Or el principe parloe exortando li creditori a star quieti, dicendo: Lippomani haver il debito lhoro ducati 120 milia; et che hanno ducati 50 milia, item, ducati 36 milia in zecha, et sier Mafio Soranzo, item, ducati 32 milia al Monte nuovo, e si desubligerà a chi harano ubligato. Item, ducati 18 milia al sal, et ducati 12 milia di debitori. Item, dieno haver ducati 10 milia da sier Andrea Capello e fradeli; et hanno il collar fo dil re Maximilian et la caxa di Muran. Item, lhoro hanno la caxa di Muran la soa parte, la caxa di questa terra, la volta di Andrea Costantini el cavalier, che valeno assai; et dice la Signoria dieno dar ducati 22 milia, di quali ne havea auto 11 milia solamente in questi dì per il consejo di X; et disse ditto sier Hironimo Lippomano che il mercore, fo il zorno avanti falisse, fè 17 carte di zornal, et vol dar ducati 10 milia a li camerlengi, computà quelli sono in la zecha, che son ducati 3000; et li creditori risposeno essi Lippomani havia li danari, qual li ocultava.