Da Ragusi, di Nicolò Gondola, di 4. Come le zente turchesche de quelli confini andavano con celerità a le marine, et l'armata facea il Signor era 30 nave, 100 galie, palandarie et fuste assai, et era per ussir con molte bombarde, mortari 10, catene grosse, et bastioni di legno. È il capitano de l'armata, chi dice Jacub bassà et chi Achmet fo fiol di Chazergi etiam bassà; et che Mustafà bei di la Valona havia mandà a Constantinopoli 45 soracomiti, et Feris bei sanzacho in Albania aspetava zente. Item, era stà amazato uno almadar dil Turcho su quel di Cataro, crede esso sanzacho l'habi fato amazar per trovar causa di far mal contra la Signoria nostra incolpando quella.
     
      Etiam fu letto una lettera del ditto, scritta a sier Domenego Beneto quasi in questo tenor, con una poliza in zifra non intesa: pur avisa che Mustafà bei dia passà su la Grecia, etc.
     
      Da Corphù, dil rezimento, di 5. Come hanno nova esser venuti quatro schiavi, portando da la porta a Fait bassà che vadi in Sophia. Item, le zente di la Natolia si dice passerà su la Grecia, siché aricordano si provedi. Et per un'altra lettera, avisano il zonzer dil provedador Malipiero; et ditte lettere è di mezo bagatin di carta.
     
      Di sier Domenego Malipiero provedador di l'armada, di 6, apresso Corfù in galia. Come a dì 5 zonse lì a Corphù, et havia messo le galie a charena per conzarle, et era alozato in terra; solicita li quatro albori dimandati, le curaze et la sovention ale zurme.
     
      Da Nepanto, di sier Zuam Moro rector et provedador, di 3. Come per una spia turcha ha l'armata era per ussir questo mexe di mazo, zoè nave 23, galie 70, fuste et parandarie 100. Item, ha 500 bastioni tra i qual uno caro li va atorno.