Item, molini a Campo di Piera per ducati 1500, che sumano più dil debito assai. Et per tanto disse voleva ubligar tutta questa facultà à lhoro creditori, poiché erano contenti de indusiar, né dimandava altro che comodità. Et questo disse hessendo di fuora li creditori; quali chiamati dentro, el principe disse alcune parole exortandoli ad esser insieme, et veder di catar sesto; et li creditori, reduti in chiesia di San Zuane elexeno prima soi capi di creditori sier Nicolò Donado q. sier Lucha, sier Andrea Foscarini q. sier Bernardo et sier Alvixe Zorzi q. sier Polo, ai quali deteno grandissima libertà come in similibus far si suole.
     
      Vene quelli haveno eri il palio a Lio, che fo il luni di pasqua di mazo, con le trombe, et fo do comandadori Piero Rosso et uno altro, et tochono la man al principe justa il consueto, et tutto il collegio.
     
      Vene l'orator dil conte ... di Frangipani, vol stera 100 formento et ducati 30; fo consultato non li dar nulla.
     
      Vene l'orator di Cataro; laudò il suo provedador sier Francesco Querini, dimandoe la expedition. Et fo balotà le monition per quel loco, castigata la poliza per l'hordine nostro, et fo expedito.
     
      Da Nepanto di domino Marco Saracho arziepiscopo di quel luogo, di 9 di l'instante. Come veniva a la Signoria nostra frate Francesco da Lignago, di l'hordine di predicatori, vien da Constantinopoli, et per avisi ha il Turcho venir a quelle bande di la Morea.
     
      Da Corphù, di sier Antonio Moro baylo, di 10. Come veniva qui el ditto frate, qual havia deposo davanti di lui et sier Domenego Malipiero provedador di l'armada, qual etiam lui scrisse, et mandono la sua depositione.