Item, disse l'armada si partiria a la fin di mazo, over fin a dì 10 di zugno, zoè fato la lhoro pasqua chiamata bayran, zoè quella dil Signor, perhochè ne fa do pasque: et intisi, a dì 10 mazo era il ditto bayran. Item, havia 12 bombarde grosse, molti bastioni di legno, et faceva far una cadena do mia lontan da Constantinopoli secreta, che era una gran cossa; et che sier Andrea Griti non poteva scriver, ma li havia ordinato li dicesse a tutti li castelli stagino vigilanti etc. Or per il principe li fo ordinato non dicesse nulla a niun. El qual frate era alozato a San Zane Polo, et fo ordinato credenza grande in collegio et sacramento a tutti, tamen tutta la terra era piena di la venuta di tal frate.
     
      Da Puola, di sier Bortolo Calbo conte, di 17. Come la nave se conzava de lì have senestro di aqua nel poner di l'alboro, pur si andava reconzando: dimanda danari per pagar li homini lavorano; et fo balotà di mandarli ducati 300 a questo effecto.
     
      Da Traù, di sier Lorenzo Corer conte. Come [741] quelli fanti, sono lì, moreno da fame: prega la Signoria li mandi qualche paga.
     
      Da Milan, di l'orator nostro, di 18. Come mandava lettere a domino Urban orator di Monferà, dice esser de importantia; et che li do oratori nostri, vien di Franza, a dì 16 zonseno a Casal; et per Milan si dicea franzesi venir di qua de' monti.
     
      Da Bergamo, di sier Hironimo Orio, et sier Francesco Baxadona rectori, di 16. Come haveano per uno sguizaro: che a dì 6, 7, 8 sguizari fono a le man con todeschi a Costanza, quali li rupeno, et amazono 16 milia todeschi, fo de' sguizari morti solum ... Et in Costanza era il ducha di Baviera, qual voleva dar a sguizari 60 milia ducati, et lasseno andar, non li hanno voluti tuor, voleno l'episcopo di Cuora lhoro ribello in le man, che ivi dentro si atrova; et dice esser sguizari 60 milia in campo, zoè 10 milia pagati dal re di Franza.