Da poi disnar fo gran consejo e messo parte per i consejeri et capi di XL che a domino Donato Carazolo cittadin da Brandizo, qual era stà electo podestà de Bitonte per il re Ferandino, et volse venir orator a la Signoria nostra per quella comunità, et per questo nel ritorno suo il re lo privò di ditta podestaria, et dil pheudo havia lì in Puja di alcune cosse, qual per esser fidelissimo nostro, l'anderà parte che al ditto sia concesso per 4 volte vadi zudexe con li rectori nostri dove a lui piacerà, et dita parte have 150 di no, el resto di la parte, et fu presa.
     
      Item, fo posto parte che de caetero li cataveri, sono et serano, possino esser electi in ogni officio sì dentro como di fuora, atento il pocho salario et utilità hanno, et siano a la condition di signori di note da poter esser electi, et cussì fu presa. Item, fu fato capitano a Verona: fu tolto sier Hironimo Zorzi el cavalier, et non passò.
     
     
      [1499 05 22]A dì 22 mazo. In collegio. È da saper in questo zorno compio anni 33, et cussì a eterna memoria qui voglio far noto.
     
      Vene Anselmo et Salamonsin da Piove zudei, per li qual fu mandato; et per il principe li fo dimandato per questo bisogno di le cosse turchesche tra tutti zudei ducati 15 milia in prestedo, con la mità in prestedo con la cauzion come li altri imprestano. Risposeno: sarìano insieme con li altri ebrei, et vederiano servir la Signoria nostra.
     
      Item, fo mandato per molti patricii, fuora di pregadi che sono richi, et li fo dimandato danari a imprestedo, et molti si scusavano per il romper di banchi; et i Lipomani ozi andono al banco.