Li fo risposto non esser tempo; et cussì fo licentiato; et per il collegio li fo donato ducati 15, e si partì.
     
      Vene li tre provedadori deputati sora le exation di danari, et sier Luca Pixani, et sier Antonio Valier zurono la consejeria, et el Valier volse haver in nota el capitolar di consejeri, et cussì Bernardin di Ambrosii, li fece uno sumario. Item, presentono li libri di debitori, et praecipue raxon nove, che sono assai.
     
      Da Roverè, di sier Nicolò da cha da Pexaro podestà, di 23. Come havia nova agnelini esser in campo in la val di Venosa persone 14 milia, contra l'exercito regio. Et per uno tornato in quella hora, 23, ha nova ditto campo regio esser roto, tamen aviserà il tutto per uno suo che di hora in hora aspectava zonzesse.
     
      Da Verona, di sier Jacomo Lion, podestà et vice capitano. Come quella camera andava mal, et consultato in collegio, atento in gran consejo si havia fato do volte capitano de lì e niun non passava, fu scritto a sier Hironimo Capello, provedador per le camere, era a Bergamo, ritornasse a Verona a veder quella raxon di la camera, per non esser capitano.
     
      Da Ferrara, dil vice domino, di 22. Come domino Latino di Pii episcopo, cugnato di Frachasso, li havia parlato che ditto Frachasso voria venir a soldo di la Signoria nostra, e mostroli una lettera, li havia scritto, e disse voler esser contra Milan, di la qual qui mandoe la copia. Item, che quel signor si acorzeva haver fato mal contra la Signoria nostra, per li mali consultori, unde andava per la terra a brazo con l'orator de Milan, di la qual cossa assai de lì si parlava, et etiam si dicea desiderava saper l'exito di Franza e ognun dicea la sua, zercha el venir o no.