Item, dil banco di Lipomano, era stà parlato e tenuto gran tenzon, dicendo di Pixani etiam seria, se la Signoria non fusse stà piezà di ducati 400 milia, con li cai dil consejo di X; e che in chiesia parlando con alcuni esso vicedomino fè gran discorsi e biasmò a Lipomani, tamen, disse niun perderà il suo, e cussì à ditto con missier Thebaldo, qual per nome dil ducha li parloe di questo. Item, che il Po era cressuto più el fosse mai, e havia fato 4 rote, et anegato molte possession dil signor verso Bologna, e havia fato gran danno.
     
      Di Padoa, di rectori, di 24. Zercha li cavalli [754] tornati di Franza con li oratori, quello habino a far. Li fo scritto li desse a li condutieri.
     
      Di Caodistria, di sier Alvixe da Mulla, podestà et capitano. Mandava la comparition fata per quelli castelli per l'armar la galia de lì.
     
      In questa matina fo dato audientia a molti, e comesse le expedition al nostro hordine. Et fo terminato, per collegio, tuor la nave di sier Alvixe Malipiero q. sier Stefano procurator e compagni per ducati 550 al mexe, e ordinato armi, et se meteria la parte. Item, sier Antonio Cocho voria ducati 500 al mexe, non poteva star con ducati 450, tamen niun di savii volse tuor la sua nave, se non come dirò.
     
      Venne l'orator di Urbim, essendo el principe in piedi per andar a caxa, et disse zercha la caxa fusse preparata. E andato fuori alcuni di collegio lo voleva honorar, altri no, etc.
     
      Item, fo expedito et balotà, per aricordo mio, di mandar una fusta, è in arsenal, a Veja, la qual de lì sia armata per custodia di quella ixola; et cussì fu fato il buletin.