Da poi disnar fo consejo di X, con la zonta di danari et collegio, per far certe ubligation acadeva far maxime a li zudei.
     
      Et ozi andai a Lio con Francesco Duodo rasonato et Zuam Filipo Aureliano, e fici la mostra di Zanon da Colorno, di fanti 250 ben in ordine, e tolto el nome suo, dil padre e il signal, fono imbarchati, vanno con la nave Pandora; et l'altro di la nave Grimana, andò via con Jacomo di Tarsia.
     
     
      [1499 05 26]A dì 26 mazo. In collegio. Fo aldido la diferentia di sier Marco Malipiero, cao di XL, era a la bancha rimasto con sier Sebastiano Zem cao imbossolato: e questo perché volea intrar ozi a la bancha che si fazeva per la bancha, e tandem poi disnar in cheba, con bossoli, fo terminato con il Zem adeo have pacientia, et il zorno da poi convene intrar per cinque zorni.
     
      Vene l'orator di Urbim, dicendo: el signor suo serà presto qui; unde fo ordinato a li oficiali di le raxon vechie fazino conxar la caxa dil marchese di Ferara et doman in pregadi si terminerà di darli il bucintoro.
     
      Et il principe prima si lezese alcuna lettera, parloe di debitori; et haver visto i libri presentadi eri per li provedadori sora la exation, maxime raxon nuove et governadori per conto di 30 et 40 per 100, et che ne erano assaissimi richi, adeo la terra andava in perdita si non si provedeva. Parloe sier Constantino di Prioli, savio dil consejo e sier Marco Sanudo, savio di terra ferma, tamen nihil concluse.
     
      [755] Da Bergamo, di rectori, di 21. Come haveano da uno comisario in Valtelina esser stà mandati 600 schiopeteri per il ducha a Milan, nel numero di qual è bona parte de' provisionati in ditta valle.