Item, non pol dir il fermo di le specie habi a esser questo anno, per restarne assai a venir, tamen si dice esser pocho piper. L'armiragio etiam si aspeta, in loco di quel morite: è homo di bon nome, et ha speso per tal officio ducati 16 milia, dubita vorà che li tornino in borsa etc.
     
      Di Napoli di Romania di sier Francesco Bragadin capitano et provedador, di 10. Come sier Piero Sanudo synico andò con soldati a Malvasia, dove è podestà sier Andrea da Riva, et ritornato lì a Napoli mandoe a cargar legnami grossi 10 gripi grandi con do caravele; et esser andati suso 300 homeni marinari, li più valenti de lì, et voleva mandar di quelli stipendiati a Legena, unde esso provedador andoe dal synico predicto, con 8 cittadini lo acompagnano, el qual li comandò, in pena ducati 1000, non parlasse, et mandò fuora li cittadini con rebuffi, qual ebeno a mal. Item, esso synico havia fato tutte le concession et gracie fate di caxe in la terra et tereni a la campagna, da poi la Signoria ha el dominio, pagino l'anno qualche onza di cera a la camera, et de presente li fa exborsar qualche marcello: è picola cossa a la camera, ma gran confusion in el populo, né voria questa inovation al presente.
     
      Da poi disnar, fo pregadi, et vene le infrascrite lettere:
     
      Da Milan, di l'orator, di 23. Come quella note el ducha havia mandato verso Zenoa do bombarde grosse, 6 cortaldi et 4 passavolanti et 50 schiopetieri, dubita dil Casteleto etiam, et è andato el conte di Cajazo a quella volta. Item, si era ditto certa nova di rota di sguizari; et essersi divulgato, ma non per via certa che misier Galeazo Visconte dia andar orator al Turcho.