Or fata la liga, post multa, perché il re volse, et monsignor di Lignì l'ajutò, et la venuta dil cardinal San Piero in Vincula a la corte valse assai, perché lui dicea al re a parte il tutto. Or uno venere, che mai si dismentegerà, concluseno ditta liga, zoè li capitoli con li consejeri regii in francese, et lui li intendeva per haver la lingua, et il sabado reduti col re in una capella con gran remori si reduseno, et tutti aspetava di fuora, et baroni et oratori di fiorentini et zenoesi, et voleano far l'instrumento di capitoli per nodari apostolici, et che la Signoria [766] tolesse il papa in protetion, ed essi oratori non volseno, l'episcopo di Selta ajutò molto il papa. Or il roy volse sottoscriver a li capitoli cussì come erano, et cussì lhoro oratori sottoscrisseno, era lì el ducha di Valentinoes fiol dil papa, et fo in Angier. Item, che quel re mostrava far gran opinion di la Signoria nostra, et dice non vol altro che la sua ducea di Milan che li aspeta di jure, et dice non stimar il papa et haver il fiol de lì, et fiorentini etiam ha ne li soi paesi, et li disfarà dil mondo hessendoli contra, sichè di altri non fa stima che di la Signoria nostra, et havia ditto hora la Signoria potrà castigar quel mato dil marchexe di Mantoa; et che 'l re li ha ditto non vol creder a li malivolli, quali dicono cosse contra la Signoria che quella non mantegnirà li capitoli, et che soa majestà vol mantenerli. Item, che li foraussiti de Napoli è partesani de la Signoria, et dicono: scire la Signoria è dura a prometer, ma come la promete atende; et che la Signoria nostra in Franza ha fama di bon governo et gran prudentia, et haver più oro che tutta Italia; et dicono la Signoria sa ben quello la fa, francesi non pol tenir stado in Italia, la Signoria non muor mai, et s'il re ha fioli sarà tra lhoro division, et non havendo fioli la Signoria torà quello il roy acquisterà in Italia: sichè li populi sono contrarii a l'impresa de Italia, et maxime la regina soa mojer.