[1499 05 28]A dì 28 mazo. In collegio. Fo aldito certa diferentia di sier Francesco di Mezo con misier Alvixe Malatini, per caxon di certi molini, et per la Signoria fu fato in favor di ditto Mezo. Item, fo aldito Bortolo di Nerli fiorentino, contra li avogadori di comun, qual era condanato in quarantia, e preso di precieder di una balotta, et seguite molti desordeni, pregando la Signoria dovesse suspender la execution fino fosseno alditi da altri avogadori, perhò che questi voleno refudar domenega: et cussì per la Signoria fono suspeso fin domenega, con questo facesse seguro l'oficio.
     
      Vene domino Tomaso Salvego zenoese, exponendo per nome di misier Zuam Alvise dal Fiesco, che pregava la Signoria tolesse a soldo suo zenero, fo fiol dil signor Zuam Francesco Gonzaga; et li fo risposto per el principe non era tempo, e bisognava atender al mar.
     
      Da Turin, di Zuam Dolze secretario, di 17. Come de lì era stà gran aque, adeo la corte volendo passar i monti per andar a Geneva sono ritornati, et che li nostri oratori vien di Franza, fono li honorati, montono in barcha. Item, esser passato cavalli di la guarnison di Aste, de li quali vieneno di Franza e vanno in Aste, et li 50 cavalli che misier Zuam Jacomo Triulzi volea mandar in ajuto de' sguizari in Alemagna, zoè 50 homeni d'arme non erano ancor partiti. Item, esser passato de lì incogniti e spesso Alexandro da Bologna et Piero Zuane da Forlì, venuti da Milano, et tornano in Franza.
     
      Da Bergamo, di rectori, di 25. Come haveano di Adamo di Bignol, habita verso il castello di Monza dil ducha di Milan: come esso ducha ha mandato 1000 fanti et 500 cavalli lì in quella valle per dubito de' sguizari, et che lì a Monza si aspectava il marchexe di Mantoa, et il ducha dovea far far lì la mostra di le zente; e si preparava il castello per il marchexe.