Item, scrive di la charavela, patron Pasqual di Zuane carga di formento, di raxon di sier Silvestro Morexini esser rota, et il patron de lì 4 zorni morite da peste; et la peste esser lì in Alexandria, et ne andava qualche uno al zorno.
     
      In questa matina li cai di X mandono tutti fuora, per lezer lettere di Nepanto, et 4 de nui savii ai ordeni, perhò che sier Faustin Barbo andoe a Roma con sier Polo Capelo, et ivi fu fata la mostra di 100 fanti di Schiaveto contestabili, va in armada; et etiam tre de nui balotassemo a Lio li peota grandi et li peota da 100 bote in zoso, et quelli de rispeto: fata la examination insieme con li cataveri sier Alvise Loredam, sier Piero Donado e sier Jacomo de Priuli, et ivi in monastier disnato a spexe di San Marco.
     
      Da poi disnar andassemo in pregadi, sichè statim compissemo.
     
      Da poi disnar fo pregadi, non vene il principe, e fu in gran consejo per il caldo, et fu fato per via de' buletini do proveditori sora la exation di danari, rimase sier Marco Barbo, fo consejer, e sier Lorenzo Venier, fo consejer, fo soto sier Hironimo Zorzi el cavalier. Item, fo posto per li savii ai ordeni, la prima cossa fusse messa, atento la galia di Fiandra non havia trovà patron, zoè quella tolse sier Piero Trivixan; et andò in renga sier Filippo Trum procurator savio dil consejo, parente di ditto sier Piero, et io Marin Sanudo savio a li ordeni li risposi dicendo questo non era el muodo di ajutar il parente con renge ma con carati, et il danno era in queste [771] galie di Fiandra, non fusse in hordine per molti respeti; poi parlò sier Hironimo Venier provedador sora l'arsenal laudando la opinion mia, dicendo le galie sarìano in hordine al tempo; li rispose sier Francesco Trum savio a la terra ferma, et non volessemo più parlar; et sier Filippo Trum e sier Francesco Trum messeno che non catando la dita galia a l'incanto patron, questo viazo sia remesso per questo anno; e andò la parte 3 fo non sincere, una di no, di li do Trum fo 25, di nui savii ai ordeni fono 126, e questa fu presa.