Item, fo posto, per nui savii ai ordeni, e tutti li savii poi intrò in opinion, di tuor la nave di Donadi, fo Mema, di bote 800 con homeni 110, per ducati 600 al mexe, con ferma di 4 mexi, con tutti i modi e condition fono tolte le altre, et ave ditta parte tutto il consejo.
     
      Item, fo posto per li savii ai ordeni di tuor la nave di sier Antonio Cocho con ducati 50 di più al mexe di quello fu preso; ave 33 di no, 130 di la parte, et fu presa.
     
      Item, fo posto per li savii dil consejo, e di terra ferma, che de tutti li stratioti serveno la Signoria nostra al presente, si debino far una mostra a Mestre, et andar debi a farla do di collegio, et ne resti 400 over 500 soto li capi parerano a questo consejo, zoè de' boni levantini, sì homeni come cavalli, quali con li segni fazino la mostra, ed abino page 10 a l'anno, et ducati 3 al mexe per uno, excepto li capi, e l'orzo, el resto sieno licentiati, et have tutto il consejo.
     
      Item, fo posto, per li savii dil consejo, terra ferma et ordeni, excepto sier Filippo Trum procurator, sier Nicolò Foscarini savii dil consejo e sier Francesco Trum savio a terra ferma, di dar el bucintoro a lo illustre ducha di Urbim, qual vien in questa terra, e il principe li vadi contra, e li paraschelmi consueti, e li sia dato ducati 25 al zorno per spexe; et li sopra notati a l'incontro messeno che 'l principe andasse contra con li piati, e se li fesse le spexe la prima sera e non più; e cussì andate le parte, niuna fo non sincera, niuna disse di no, di quella di tre savii 36, di quella dil resto di savii 130, e fu presa.