Item, fono provadi li patroni di Baruto, e rimaseno, zoè: sier Francesco Michiel de sier Antonio, tolto per i Loredani, sier Jacomo Corner q. sier Donado e sier Zuam Morexini q. sier Orsato, manchava sier Lion da Molin q. sier Nicolò, havia serà la carata, manchava la età.
     
      Da Constantinopoli. Fo leto una lettera drizada [772] a sier Andrea Zanchani, di sier Andrea Griti, data in Pera a dì 25 april in zifra: come non diceva altro di l'armata di quello ha scrito, ma ben avisava lo esercito andava ne la Grecia, e si dice va a Rodi, tamen lui crede va in la Grecia, non pol scriver altro: ma che si debbi proveder a le terre nostre.
     
     
      [1499 05 29]A dì 29 mazo. In collegio. Vene Jacomo Coltrin inzegner, stato a Feltre per veder quelle mura per repararle, et portò lettere di sier Matio Barbaro, podestà et capitano de lì, et aldido li oratori di la comunità. El qual Coltrin, disse: quelle mura non stava bene cussì, ma voleva far una forteza a uno loco over passo e si spenderà solum ducati 6000, e disse l'opinion sua di la forteza di Schener, ch'è in loco importante; et visto il disegno fo terminato scriver a quel podestà, et a domino Andrea Trevixan episcopo de lì, qual alias fu podestà in quel luogo, quali insieme con alcuni citadini, debino veder questa opinion di Coltrin, zerca il far di la forteza e poi rescriver.
     
      Vene l'orator di Urbim, e li fo ditto la deliberation di andar contra el suo signor con el bucintoro, et venisse la domenega, el qual ringratiò e disse verà con assa' persone; et il principe li disse come se li daria 26 ducati al dì per spexe.