Item, haver ricevuto lettere si li comanda mandi li aventario di le monition, manderano; ma dannano li syndici haver tochà danari da quelli haveano monition auto de lì. Per un'altra scriveno haver ricevuto li tornesi farà continuar le fabriche. Item, esser tornà uno de' cinque messi da Constantinopoli, porta lettere di sier Andrea Griti a soi parenti, ma nulla scrive a la Signoria nì a lui baylo. Item, mancha uno messo, dubita sia mal capitado; et dimandano licentia di butar certe caxe zoso lì a Corphù, per più forteza dil loco. Item, che lasserano passar vituarie de lì che andasseno a Rhodi, justa le lettere scritoli. Item, haveano nova, per alcuni, come lo exercito turchescho si dia trovar in uno loco chiamato Chipsala, in una campagna tra Natolia et Grecia, et de lì puol tuor il camin dove li piace.
     
      Di sier Domenego Malipiero provedador di l'armada, data apresso Corphù in galia, a dì 16. Narra le provision fate, et fabriche a Corphù per fortification di la terra. Item, haver conzà le galie, et avisa nove ut supra.
     
      [783] Di Modom, di sier Antonio Bon provedador, di primo mazo. Come Caracasam turcho corsaro havia fato danno a Syo, et menato via anime. Item, el signor di Cogno, fiol dil Turcho, vien in campo. Item, el diodar era verso el Sayto, a dì 12 dil passato, et alia nova.
     
      Di sier Nicolò da cha da Pexaro provedador di l'armada, data in Galia apresso Modon, a dì 12. Manda lettere di Cypro, et uno capitolo di sier Beneto Sanudo consolo a Damasco, et avisi di Rodi. Item, che di l'armada nostra solamente le galie di Candia, numero 3, erano lì zonte.