Item, che l'exercito terestre, et zente si redusse a Philipopuli, Sophia e Scopia, zoè a queste bande; e hanno fato comandamento a li capi, non si tagli le erbe e non si venda il grano; et Mustafà bei esser andato a Constantinopoli per intrar in galia; et li soracomiti esser partidi per le galie. Item, el dito Gondola scrive ai retori di Zara di 16, zanze assai zercha queste cosse turchesche; et dice sier Andrea Griti, vol dir Pexaro, partì a dì 24 april da Constantinopoli, vien per terra a Corphù, e l'armada esser in ponto, e fin questo dì o per tutto april ussirà, et mostrerà la faza a queste bande adriatice, per quanto de lì intendevano.
     
      In questa matina fo sposa la fia di sier Hironimo Zorzi el cavalier, in sier Stefano Trivixan q. sier Domenego. Colegio si levò a bona hora per questo.
     
      Da poi disnar fo pregadi, et a nona zonse il gripo, veniva.
     
      Da Puola, di sier Bortolo Calbo conte. In materia di quella barza si conzaga, si andava lavorando, dimanda danari, e zà li era stà mandati.
     
      Da Corphù, dil rezimento, di 13 et 14. Zanze nulla da conto, dubitano di quel loco, fanno provision, aricorda non si manchi.
     
      Dil capitano zeneral, di 21 et 22. Come a dì 20 zonse con galie; lauda sier Domenego Malipiero provedador ora lì con le sue galie, zoè a Corphù, aricorda i bisogni, à a bon animo. Item, haver trovà lì le galie di Barbaria, capitano sier Andrea Baxadona, qual le manda a Modom. Item, esser zonta lì la galia di Otranto, et de Monopoli. Per l'altra lettera di 22 dice haver bon animo, aricorda le provision, manda lettere da Modom, et esser venuto a lui sier Andrea da Pexaro, q. sier Nicolò da Londra, vien da Constantinopoli, partì a dì 25 april, non scrive la sua relation, lui la dirà a bocha.