Item, manda copie di lettere dil Triulzi, mandate al re; et che soa majestà era partito, et ordinò esso orator restasse lì a Bles, etc. Item, el ditto orator scrive di 29, data a San Zorzi apresso Paris, avisa esser stà dal re, qual li fè bona ciera; et scrive in zifra come sua majestà voleva mandar 12 milia fanti verso [792] Aste, zoè picardi 3000, guasconi 3000, soto uno capitano, et zà erano partiti 6000; et il re vol andar a Paris, in Bergogna poi a Lion dove sarà questo lujo. Item, arà 1500 lanze francose di qua dai monti. Item, havia mandato 4 oratori in Bergogna, monsignor di Lignì, el cardinal Roam over monsignor di Roam, monsignor di Ravastel et monsignor de la Gratusa, per haver il juramento di le terre da l'archiducha, el qual vien fuora del suo stado a jurar: et cussì fono andati con cavalli 500. Item, il re vol mandar in Italia 200 zentilhomeni soi, et 50 di la raina. Item, ha mandato oratori al re di romani et sguizari, et nomina quali sono, per adatarli et dirli che per le nove turchesche non è bon si fazi guerra tra cristiani: et questo sua majestà fa perché sguizari non pol più durar, e vol mostrar lui sia causa di tal acordo. Item, che 'l ducha di Lorena, qual era a la corte, si raccomandava a la Signoria nostra. Et che li oratori partiti per venir qui, sono monsignor de Beumonte e cavalier Barom capitano di lanze 100, et domino Acursio Mainery doctor, major judice di Provenza. Item, che il re li mostrò uno capitolo, li scrivea Placido di Roma contrario di quello scrisse per l'altra lettera, e dicea la Signoria nostra volea ajutar soa majestà a l'impresa.