Item, che esso orator seguiva il re, qual era andato in molti castelli, et alcuni castelli sono apestati, siché va con pericolo; solicita la Signoria vogli mandar li successori, et etiam danari.
     
      In questo pregadi, justa la parte presa, fo leto per Francesco da la Zuecha la lettera M. di debitori di le cazude Monte vechio et nuovo.
     
      Item, fo balotà Francesco Vasallo patron di la nave Zustignana, va con pelegrini al Zaffo, et havia dato li piezi, et fo provado.
     
      Ancora fono balotà li 4 patroni di Alexandria: rimase solum sier Trojam Bolani, cazete sier Zusto Guoro have balote 103, 63, sier Polo Calbo 113, 48, sier Vicenzo Polani 114, 54, et atento voleno haver li patroni si prova li tre quarti, questi cadeteno. Et per li consejeri e li savii ai ordeni, fo posto parte de incantar le ditte tre galie di Alexandria, doman da matina, a danno di patroni, e quelli li torano si debino provar in termine di zorni 6; et ditta parte have 6 di no et 180 de sì, et fu presa.
     
      Item, referite el principe quello havia ditto el ducha de Urbim quando el vene in collegio, e poi quello mandoe a dir per l'orator suo; et fo posto parte, per sier Ferigo Corner procurator, sier Constantin di Priuli e sier Marchio Trivixam savii dil consejo, di responderli a un modo; et sier Filippo [793] Trum procurator, sier Nicolò Foscarini savii dil consejo, sier Francesco Trum, sier Alvixe Venier, sier Marco Sanudo savii da terra ferma, di responderli quasi volendo darli licentia, e si lui rispondeva altro, con quello si havesse si dovesse venir al consejo; et sier Polo Pixani el cavalier savio a terra ferma nulla volse meter; et contradixe a queste parte sier Marco Antonio Morexini el cavalier consejer, et disse in favor dil ducha de Urbim, e disse mal dil conte di Pitiano e tuta casa Orsina, commemorò tutti li condutieri, quali li lexe in renga, e disse mal di tutti excepto di Zuam Paulo Manfron et Antonio di Pii, fo molto longo e tedioso, et venuto zo di renga, per esser l'hora tarda fo licentiato el consejo, et comandato gran credenze.