Da Cataro, di sier Francesco Querini rector e provedador, di 20 mazo. Avisa zerte nove di l'armata turchescha; et che lo exercito si reduse a Chipsala, per esser stà a Constantinopoli discoperto uno tratato di Rodiani che voleano far brusar l'armada, [794] quali erano stà fati morir. Item, el sanzacho Ferisbei esser partito di Scutari; et esso provedador, auto li cani di cai, li manderà a ditto Ferisbei justa i mandati, ma che in Scutari si facea gran guarde preter solitum, et si serava do hore avanti le porte, et si apriva do hore da poi dil consueto per il partir di ditto sanzacho. Item, che l'armada andava a Rodi, et di 7 fuste turchesche andava verso ponente. Item, che la galia, si dovea armar de lì, lo aspectava, la qual si armeria subito, et dita galia eri partì de qui; et questa è l'ultima mancha a partir di quelle si arma fuora in Dalmatia. Item, esso provedador scrive faceva far il ponte, e che quelli di Castelnuovo manazava non voler lassarlo compir, e voleno scriver di questo a la porta. Per un'altra lettera, scrive zercha le munition è de lì justa la parte presa. Et è da saper Martinel da Lucha va contestabile lì a Cataro con fanti 150, et li megii per la munition sono mandati zà via, justa la parte misi.
     
      Dal Zante, di sier Marco Antonio Contarini soracomito, data in galia, a di ... mazo. Come era stà a Patras, et havia parlato col prothojero di la Morea, e havia nova l'armata è per ussir, over a dì 3 di mazo esser ussita di streto, la qual va a Rhodi.
     
      In questo pregadi, compito di lezer le lettere, sier Domenego Trivixan, el cavalier avogador, andò in renga, e fu in gran consejo, e menoe la balotation fata eri de li patroni di Alexandria, quanto aspeta a li tre cazudi, atento li desordeni e il bisogno si havia di haver le galie presto: laudò ditti patroni; et io fici lezer la lhoro oblacione di voler andar a li servicii di la Signoria, et iterum leto le polize di la charata, fo posto parte per ditto avogador che 'l sia tajà la balotation fata eri consecutis.